फौजी फ़ौजण दोचश्मी - नया हरयाणवी गाना गीत कविता राग रागनी

फौजी फ़ौजण की दोचश्मी

फ़ौजण : तेरे प्रेम में पड़ के ने मेरे तन की ढेरी हो ली 

तेरी मर्जी तूं जाणे पर मैं तो तेरी हो ली

फ़ौजण : तूं आवे ना ख़त तेरा मैं देखे जा सु बाट पिया

फौजी : मैं भारत माँ की करूं नौकरी, तूं ले न अपना डाट हिया 

फ़ौजण : के मरु कालजा काट पिया, इब देर भतेरी हो ली 

तेरी मर्जी तूं जाणे पर मैं तो तेरी हो ली   

फ़ौजण : टेलीफोन मोबाइल धोरे, कदे  करे न कॉल पिया 

फौजी : हाड कंपाती बर्फ में गौरी, होज्या से बेहाल जिया 

फ़ौजण : तने जब भी कर ल्यूं कॉल पिया, तेरी शाम सवेरी हो ली 

तेरी मर्जी तूं जाणे पर मैं तो तेरी हो ली   

फ़ौजण : मेरे ते प्यार करया करता इब पूजन लाग्या हिन्द ने

फौजी : देश ते उपर कुछ भी कोन्या, चाहे बूझ लिए आनन्द ने 

फ़ौजण : के रो ल्यूं इस आनन्द ने एक बे दिखा के शान ल्ह्को ली 

तेरी मर्जी तूं जाणे पर मैं तो तेरी हो ली   

गीतकार : आनन्द कुमार आशोधिया  © 2019-20

Note : Content on this blog is copyright.  Whole, partial or any part of this blog may not be used, acted, enacted, reproduced or recreated in any form without written permission from the owner (Anand Kumar Ashodhiya Email : ashodhiya68@gmail.com Mobile No.9963493474). Thanks in advance.

• Tweet
• Share
• Share
• Share
• Share