धोखा चीन का - गलवान घाटी - नई हरयाणवी रागणी 

रणभूमि में वीर लड़या करैं,ना पाछै कदम हटाऊँगा

मेरी माँ ने शेर जण्या सै, ना उसका दूध लजाऊँगा

भारत माँ का मैं वीर सिपाही, दयूं बॉर्डर ऊपर पहरा

चौकी ऊपर खड़या तिरंगा, फर फर फर फर फहरा

चौकस रहियो, चौकस रहियो, मेरा कमाण्डर कहरा 

धोखेबाज लुटेरे चीनी, ये तै घात करैं घणा गहरा

सलूट मारकै, अटैंशन होग्या, ना पलक ताही झपकाउंगा

इतनी कहकै सी ओ साहब, दौरा करणे चल्या गया

करकै वायदा चीन भूलग्या, याद कराणे चल्या गया

बिन हथियारां बात करी पर, धोखे के म्ह छल्या गया

तू तू मै मै धक्कामुक्की, झगड़े में निहत्था दल्या गया

एक शेर घणे गादड़ चीनी, बोल्या एकला ए सबक सिखाऊंगा

भारत माँ के बीस लाड़ले, चीनीयां गैल्या भिड़गे

बिन हथियारां टूट पड़े, फिर दुश्मन स्यामही अडगे

चीनी ले रहे लठ और डंडे, हम ताल ठोंक कै बड़गे

अरै भर भर कोळी नाड़ तोड़ दी, चीनी ठण्डे पड़गे

कुछ मारे, कुछ नदी में गेरे, एक एक नै मजा चखाऊंगा

दहशत फैल गई चीनीयां में, छोरियाँ की ज्यूँ रोवैं 

शव पे शव और टूटी गर्दन, वे तै रो रो मुंह ल्हकोवैं 

हम बीस शेर हुए खेत देश पै, वे चाळीस का शव ढोवैं

हम रणवीरों की शक्ल देख कै, वे धरती में सिर गोवैं

करकै देश सुरक्षित आनन्द, चिरनिंद्रा सोज्याऊँगा

कॉपीराइट©️आनन्द कुमार आशोधिया©2021-25

New Haryanvi Ragni #hitragni #hr #hr10 #ragnilover #ragnidesi #desi #desiragni #haryanvi_version #ragniversion #newharyanviragni #haryanvi #ragni #ragnistatus #ragnicompetition  #haryanviragni #haryanvisong #anandkumarashodhiya #हरयाणवी #रागनी #आनन्दकुमारआशोधिया