रील बणावण के चक्कर में - नई हरयाणवी रागनी

 

रील बणावण के चक्कर में - नई हरयाणवी रागनी 

फेसबुक और इंस्टाग्राम पै, एक नया पुवाड़ा होग्या

रील बणावण के चक्कर में, यो देश उघाड़ा होग्या

भले घरां की बहू और बेटी, आज रील बणावण लागी

अंग प्रदर्शन करैं अर्धनग्न हो, वाह वाह पावण लागी

वक्ष दिखाकै, नितम्ब हिलाकै, उरोज हिलावण लागी

कदे बन्द कमरे में कदे छात पै, खड़दम तारण लागी

लाज शर्म सब बेच कै खागी, यो घर घर राड़ा होग्या

आँख नचाकै, मुँह बितराकै, कामुक इशारे करण लगी

लाइक पावण के चक्कर मे, पींघ इश्क की भरण लगी

अंजाणे और गैर मर्द की, बाँहया के महँ तिरण लगी

सैर सपाटे गळ बंहिया हो, होटल मोटल फिरण लगी

इश्क का भाण्डा फूट गया फिर, घर मे खाड़ा होग्या

घर की भाभी, बहू गाम की, बणी सैटिंग और पटोले

भाण और बेटी फीम अर लाडू, इन कवियाँ नै कित रो ले

गन्दी भाषा, गन्दा गाणा, दो अर्थी मतलब टोह ले

स्याणा माणस शर्म के मारे, सिर धरती में गो ले

गायक नायक गीतकार सब, धन का लाड़ा होग्या

सभ्यता और संस्कृति का, हरियाणे में हयास हुया

डी जे आळे गाणे सुण सुण, नई पीढ़ी का नाश हुया

हास्य नाटक लाइव स्टैंडअप, सबका पर्दाफाश हुया

देख देख कै ढंग दुनिया का, एक नया आभास हुया

कहै आनन्द शाहपुर संस्कृति का, काम बिगाड़ा होग्या

रील बणावण के चक्कर में, यो देश उघाड़ा होग्या

कॉपीराइट©आनन्द कुमार आशोधिया©2025  

New Haryanvi Ragni #hitragni #hr #hr10 #ragnilover #ragnidesi #desi #desiragni #haryanvi_version #ragniversion #newharyanviragni #haryanvi #ragni #ragnistatus #ragnicompetition  #haryanviragni #haryanvisong #anandkumarashodhiya #हरयाणवी #रागनी #आनन्दकुमारआशोधिया