मुफ्तखोरी और लालच की लोगो - नई हरयाणवी रागनी

 

मुफ्तखोरी और लालच की लोगो - नई हरयाणवी रागनी

अरै साधन सम्पन्न इज्जतमन्द भी, करण लागगे जारी

मुफ्तखोरी और लालच की लोगो, देश कै लगी बिमारी

म्हारै कोठी बंगले महल हवेली, गाडी घोड़े खड़े हुए

अन्न धन का म्हारै घाटा कोन्या, देहळी ताही अड़े हुए

सरकारी पिन्शन बणवादो, जणूं पैसे पाज्याँ पड़े हुए

कोटे का राशन दिलवादो, गेहूँ मिलो चाहे सिड़े हुए

मुफ्त का राशन, मुफ्त की पेन्शन, लालच होग्या भारी

कर फर्जीवाड़ा कागज़ात में, उम्र पुराणी लिखवाली

चाळीसमें म्ह साठ लिखाकै, बुजुर्ग पेन्शन बणवाली

हर महीने मिलै नकद पैन्शन, साथ में ल्यावै घरवाली

कर कै दस्तख झूठ मूठ के, बैंक की कापी भरवाली

लूट लूट कै घर भर ल्यूँगा, चाहे कोष रीतो सरकारी

मिलीभगत और रिश्वत आगै, सब सिस्टम बेकार हुया

सरकारी बाबू तै मिलकै, मैं राशन का हकदार हुया

बी पी एल का कार्ड ले कै, मैं मँगता में शुम्मार हुया

गरीब आदमी का हक था मैं, ले कै राशन पार हुया

गरीब मरो चाहे भूखा रहो ना, मेरे सिर जिम्मेवारी

ऐंठ अकड़ दुगणी राखूँ खा, बेईमानी का राशन मैं

घिट्टी के म्ह बूड़का भरल्यूं, जो खलल करै मेरे शासन मै

गोरमेंट ना किसे काम की, देउँ बेशर्मी तै भाषण मैं

पतली गळी तै चोरी कर कै, खुड़कण दयूं ना बासण मैं

कहै आनन्द शाहपुर चोर मोर पै, हुई चोराँ की सरदारी 🙂

कॉपीराइट©️आनन्द कुमार आशोधिया©2021-25

New Haryanvi Ragni #hitragni #hr #hr10 #ragnilover #ragnidesi #desi #desiragni #haryanvi_version #ragniversion #newharyanviragni #haryanvi #ragni #ragnistatus #ragnicompetition #haryanviragni #haryanvisong #anandkumarashodhiya #हरयाणवी #रागनी #आनन्दकुमारआशोधिया